Биз жаўынгер самбо ҳәм ветеран самбошылар арасында пайтахтымызда болып өткен Өзбекистан чемпионаты барысында оның ҳүрметли мийманы, атақлы бокс шебери, «Сидней-2000» олимпиадасының алтын медаль ийеси, жәҳән, Азия, бир неше мәрте Өзбекистан чемпионы, жәҳән кубогы ийеси, профессионаллық бокстың WBO жөнелиси бойынша үш мәрте жәҳән чемпионы, Өзбекистан Республикасында хызмет көрсеткен спортшы Муҳаммедқәдир Абдуллаев пенен ушырасып, өзимизди қызықтырған сораўларға жуўап алған едик.

Муҳаммедқәдир, республикамызға хош келипсиз! Бул Қарақалпақстанға биринши сапарыңыз шығар?

Ҳақыйқатында да, Қарақалпақстанда биринши рет болыўым. Соған қара­мас­тан, бул жердеги әмелге асырылып атырған ири қурылыс жумысларынан, қарақалпақ халқының миймандослығынан қатты тәсирлендим. Манежге келместен алдын Нөкис Олимпия резервлери колледжинде болып, жас бокс шеберлерине шеберлик сабағын өткен едим. Олардың көзлериндеги алға умтылыўшылықты, талпынысты көрип, оғада тәсийин қалдым.

Қала берсе, қысқа ўақыттың ишинде Қарақалпақстандағы тарийхый орынларды тамашалаўға да үлгердим. Қулласы, тәсирлерим бир дүнья. Аўылласым ҳәм жақын ағам, Өзбекистан халық шайыры, марҳум Муҳаммед Юсуфтың неге қарақалпақ диярына асыға беретуғынының мәнисин анық түсиндим.

Ол кисиниң сизге арнап жазған қосығын ең биринши рет оқы­ға­ныңызда қандай сезимде болдыңызs Қала берсе, сиз өзбек халқынан шыққан биринши Олимпиада чемпионысыз. Бул атақтың арадан он алты жыл өткеннен кейинги жуўапкершилигин қалай түсинесиз?

Шынын айтсам, бул қосыққа баҳаны халықтың өзи бере берер. Лекин, қосықтың маған бурынғыдан да бетер үлкен ўазыйпа жүклегенин жасырмайман. Себеби, ҳәр қандай қосықтың яки әдебий шығарманың қаҳарманы, оған ылайық болыўдың жуўапкершилиги өз алдына. Ҳәр қандай чемпионға болған мүнәсибет, көрсетилетуғын иззет-ҳүрметлер оны өзин усындай сыйласыққа мүнә­сип тутыўға мәжбүр­лейди.

Сиз ҳәўескер бокс­тан соң профессионаллық бокс пенен де шуғылландыңыз. Бул сизге не берди?

Хабарыңыз бар, ҳәзир елимизде профессионаллық боксқа деген итибар күшейди. Қаншадан-қанша шерим қолғап шеберлеримиз дүньяның мен деген боксшылары менен теңбе-тең алысып, көпшилик жағдайда оларды жеңилиске ушыратып келмекте. Мен де АҚШтың Лас-Вегас қаласында бир неше жыл даўамында профессионаллық бокс пенен шуғылланып, азлы-көпли дәрежеде табысларға еристим. Бул арқалы ҳүрметли Президентимиздиң халқымыз уллары ҳеш кимнен кем емес деген пикирин ис жүзинде көрсете алғаныма оғада қуўанышлыман.

Қарақалпақстанлы боксшылар туўралы не айта аласыз?

Сизге бир нәрсени айтыўым керек, егер мен биринши Олимпиада чемпионы болған болсам, Өзбе­кис­тан өз ғәрезсизлигине ерискеннен кейин Азия ойын­ларының туңғыш чемпионы сизиң республикаңызда жасап атыр. Ол ­ Әлишер Әўезбаев. 1994-жылы Хиросимаға жол ал­ған сайланды команда қурамында мен де бар едим. Бирақ, бизлердиң көпшилигимиз жас болғанлығымыз себепли өз беллесиўлеримизди жеңилис пенен жуўмақладық. Әне сонда Әлишер Әўезбаевтың алтын медалы бәримизди жубатып ғана қоймай, өз күшимизге болған исенимди пайда еткен еди. Усындай талантлы боксшы дүньяға келген топырақта келешекте күшли шерим қолғап шеберлери, чемпионлар көп­леп жетилисип шығатуғынына исенемен. Буның ушын республикаңызда барлық мүмкиншиликлер бар деп ойлайман.

Муҳаммедқәдир, дәстүрий сораў, ҳәзир не менен бәнтсиз ҳәм келешектеги режелериңиз қандай?

Бүгинги күнде Өзбе­кистан Профессионаллық бокс федерациясының биринши вице-президенти лаўазымында ислеп атырман. Май айының ишинде Ташкенттеги «Юнусабад» ком­п­лексинде профессионаллық бокс кешесин өткериўди жобаластырғанбыз. Бундай кешени келешекте Қарақалпақстанда да өткериў федерациямыздың ис-режесине киргизилген. Демек, алдағы ўақытлары қарақалпақстанлы бокс ышқыпазлары да қызықлы беллесиўлердиң гүўасына айланыўы мүмкин.

Мазмунлы сәўбетиңиз ушын рахмет! Алдағы жумысларыңызда табыслар тилеймиз. «Еркин Қарақалпақстан» газетасы оқыўшыларының арасында да спорттың, әсиресе, бокстың ықласбентлери көпшиликти қурайды. Оларға болған тилегиңиз бенен сәўбетимизди жуўмақласақ?

Рахмет. Газета оқыўшыларына беккем денсаўлық, шаңарақларына аманлық, елимиздиң гүллеп-раўажланыўы жолында ат­қарып атырған ийгиликли ислеринде табыс, әўмет ҳәмийше жолдасы болыўын тилеймен.

С.ЖАНИЕВ

СҮЎРЕТТЕ: Муҳаммедқәдир Абдуллаев.

Манба: erkinkarakalpak.uz